ஏனென்றால், அமெரிக்க பிரதிநிதி பிரெண்டன் லிஞ்ச் இந்தியா வந்து, இரு நாடுகளுக்கும் இடையே முடங்கிப்போன வர்த்தகப் பேச்சுகளை மீண்டும் துவங்கவுள்ளார். அடுத்து, அமெரிக்க பெடரல் ரிசர்வ் வங்கியின் வரவிருக்கும் பணக் கொள்கைக் கூட்டம். இவை ரூபாயின் எதிர்காலப் போக்கை தீர்மானிக்கக்கூடும்.

டிரம்பின் நடவடிக்கை

அமெரிக்க அதிபர் டொனால்ட் டிரம்ப், ரஷ்யா -- உக்ரைன் போரை முடிவுக்குக் கொண்டுவர, நேட்டோ அமைப்புக்கு ஒரு கடிதம் அனுப்பினார். அதில், ரஷ்ய எண்ணெய் இறக்குமதியை நிறுத்தி, சீனப் பொருட்கள் மீது 50 - -100 சதவீதம் அளவுக்கு வரி விதிக்க வேண்டும் என்று அவர் கோரினார்.

இந்த நடவடிக்கை, ரஷ்யாவிலிருந்து எண்ணெய் வாங்கும் நாடுகளைக் குறிவைப்பதில் டிரம்ப் உறுதியாக இருப்பதை தெளிவாகக் காட்டுகிறது.

இந்த நிச்சயமற்ற சூழல், ரூபாயின் மீதான அழுத்தத்தை அதிகரிக்கிறது, இதனால் மேலும் ஏற்ற இறக்கங்கள் ஏற்பட வாய்ப்புள்ளது.

அமெரிக்க பொருளாதாரம்

அமெரிக்காவில் நுகர்வோர் நம்பிக்கை செப்டம்பரில் குறைந்துள்ளது. நுகர்வோர் செலவு குறைந்தால், அது அமெரிக்க டாலருக்கு பலவீனத்தை ஏற்படுத்தும், இது இந்திய ரூபாய்க்கு ஓரளவு ஆதரவை அளிக்கக்கூடும்.

பெடரல் ரிசர்வ் வங்கியின் கவர்னர் லிசா குக்கை பதவியிலிருந்து நீக்க டிரம்ப் நிர்வாகம் முயற்சித்ததை எதிர்த்து, லிசா குக் நீதிமன்றத்தில் வழக்கு தொடர்ந்துள்ளார்.

இந்த நிலைமை, மத்திய வங்கியின் சுதந்திரத்திற்கும், அரசியல் தலையீட்டிற்கும் இடையே நிலவும் பதற்றத்தை எடுத்துக்காட்டுகிறது. இது நிதி நிலைத்தன்மைக்கு அபாயத்தை ஏற்படுத்தலாம்.

இந்தியாவின் பணவீக்கம்

உள்நாட்டுப் பொருளாதாரத்தைப் பொறுத்தவரை, ஒரு வருடத்திற்குப் பின், இந்தியாவின் நுகர்வோர் விலைகள் ஆகஸ்ட் மாதத்தில் 2.07% ஆக உயர்ந்துள்ளன.

இது ஜூலையில் இருந்த 1.61%ஐ விட சற்று அதிகம், மேலும் ரிசர்வ் வங்கியின் 2% குறைந்தபட்ச வரம்பை விட சற்று அதிகமாக உள்ளது. இந்த சீரான பண வீக்கப் போக்கு, ரூபாய்க்கு ஒரு வலுவான அடித்தளமாக அமையும் என்று எதிர்பார்க்கப்படுகிறது.

எதிர்கால பார்வை

தற்போதைய சூழலில், அமெரிக்க டாலருக்கு எதிரான இந்திய ரூபாயின் மதிப்பு, ரூபாய் 87.80 - 88.60 என்ற வரம்புக்குள் வர்த்தகமாகும் என்று எதிர்பார்க்கப்படுகிறது. ஆனால், வரவிருக்கும் வர்த்தகப் பேச்சு ஒரு முக்கிய திருப்புமுனையாக இருக்கலாம். இந்த வரம்பிலிருந்து ஏதேனு ம் ஒரு பக்கம் மதிப்பு மாறினால், அது ரூபாயில் 40 - -50 பைசா அளவிற்கு விரைவான மாற்றத்தை ஏற்படுத்தலாம்.