ராமதாஸ் பயோபிக் 'அய்யா' கைவிடப்பட்டதா?

பாட்டாளி மக்கள் கட்சி நிறுவனர் டாக்டர் ராமதாஸ் பற்றிய பயோபிக் படமாக 'அய்யா' படம் கடந்த வருடம் ஜுலை மாதம் அறிவிக்கப்பட்டது. சேரன் இயக்கத்தில் ஆரி அர்ஜுனன் நாயகனாக நடிக்க படத்திற்கான சில போஸ்டர்களுடன் அறிவிப்பு வெளியானது. ஆனால், இதுவரையில் படப்பிடிப்பு ஆரம்பமாகவில்லை. படம் ஆரம்பிக்கப்படுமா இல்லையா என்பது குறித்து உறுதியான எந்தத் தகவலும் இல்லை.

இந்நிலையில் சமீபத்திய பேட்டி ஒன்றில் இந்தப் படத்தை விட்டுவிட்டு தனது அடுத்த பட வேலைகளை ஆரம்பிக்கப் போகிறேன் என இயக்குனர் சேரன் தெரிவித்துள்ளார். அரசியல் ரீதியாக அப்பா ராமதாஸ், மகன் அன்புமணி ஆகியோர் பிரிந்ததுதான் இதற்குக் காரணம் எனத் தெரிகிறது.

லைகா புரொடக்ஷன்ஸ் நிறுவனத்தில் தலைமை அதிகாரியாக இருந்த ஜிகேஎம் தமிழ்க்குமரன் இப்படத்தைத் தயாரிப்பதாக இருந்தார். அவரும் காங்கிரஸ் கட்சியில் இணைந்து தற்போது பென்னாகரம் தொகுதி சட்டமன்றத் தேர்தலில் போட்டியிடுகிறார். இவர் குறித்தும், இவரது அப்பா ஜிகே மணி குறித்தும் அன்புமணி மகள்கள் சமீபத்தில் விமர்சித்திருந்தார்கள்.

இதனால், 'அய்யா' படம் இனிமேல் ஆரம்பமாகாது என்றே தெரிகிறது.