தமிழ் சினிமாவில் திரைக்குப் பின்னால் நடந்த சில சுவாரஸ்ய சம்பவங்கள்

திரையில் நாம் பார்த்து ரசித்த காட்சிகள், அவற்றின் பிரம்மாண்டம், நகைச்சுவை என ஒவ்வொரு விஷயத்திற்கு பின்பும் ஒரு சுவாரஸ்யமான நிகழ்வுகள் வெளியில் தெரியாமல் மறைந்திருக்கின்றன. திரைக்கு பின்னால் நடந்த இந்த சுவாரஸ்யங்கள் அனைவருக்கும் ஆச்சரியம் தருவதாகவும் இருக்கும். அப்படி தமிழ் சினிமா ரசிகர்களால் கொண்டாடப்பட்ட சில படங்களில் இருக்கும் சுவாரஸ்யமான விஷயங்களுக்கு பின்னால் மறைந்திருக்கும் ஆச்சரியம் தரும் உண்மைகள் பற்றி தெரிந்து கொள்ளலாம்.

1. ரஜினியை அடிக்க மறுத்த ஜெயராம்

'முத்து' (1995) படத்தில் சரத் பாபு நடித்த 'ஜமீன்தார்' கதாபாத்திரத்தில் முதலில் நடிக்க அணுகப்பட்டவர் மலையாள நடிகர் ஜெயராம். ஆனால், படத்தில் வரும் ஒரு காட்சியில் ரஜினிகாந்தை ஓங்கி அறைய வேண்டும் என்பதால், என்னால் சூப்பர் ஸ்டாரை அடிக்க முடியாது, ரசிகர்கள் ஏற்றுக் கொள்ள மாட்டார்கள் எனக் கூறி அந்த வாய்ப்பை மறுத்துவிட்டார். பிறகே அக்கதாபாத்திரத்தில் சரத் பாபு நடித்தார்.

2. 'நாயகன்' படத்தின் ஐகானிக் வசனம் எப்படி உருவானது?

மணிரத்னம் இயக்கத்தில் கமல்ஹாசன் நடித்த 'நாயகன்' படத்தின் கிளைமாக்ஸில், சிறுவன் ஒருவன் கமலைப் பார்த்து நீங்க நல்லவரா... கெட்டவரா? என்று கேட்பான். இந்த வசனம் மணிரத்னத்தின் சொந்தக் குடும்பத்தில் நடந்த ஒரு நிஜச் சம்பவத்தால் தூண்டப்பட்டது! மணிரத்னத்தின் அண்ணன் ஜி.வெங்கடேஸ்வரன் (GV) தன் வீட்டிலிருந்த குழந்தையிடம் பேசும் போது, அந்த குழந்தை அவரிடம் அப்பாவித்தனமாகக் கேட்ட கேள்வியே பின்னாளில் தமிழ் சினிமாவின் வரலாற்றுச் சிறப்புமிக்க வசனமாக மாறியது.

3. விக்ரம் : இந்தியாவின் முதல் கணினித் தொழில்நுட்ப படம்

1986-ல் வெளிவந்த கமல்ஹாசனின் 'விக்ரம்' படம், இந்தியாவில் முதன்முதலில் பாடல்களைக் கணினி மூலம் (Computerized Music / Synthesizer Automation) பதிவு செய்த திரைப்படமாகும். இளையராஜா இந்த கணினி தொழில்நுட்பத்தைப் பயன்படுத்திப் பாடல்களைச் உருவாக்கினார். அதுமட்டுமின்றி, அனிமேஷன் கிராபிக்ஸ் மற்றும் ஹைடெக் கேஜெட்களை தமிழ் சினிமாவிற்கு அறிமுகப்படுத்திய முன்னோடிப் படமும் இதுவே.

4. 'பாட்ஷா' படத்தின் இடைவேளைக் காட்சி

சுரேஷ் கிருஷ்ணா இயக்கத்தில் ரஜினி நடித்த 'பாட்ஷா' படத்தில், ரஜினியைப் கம்பத்தில் கட்டி வைத்து அடிக்கும் அந்த மாஸ் இடைவேளைக் காட்சி முதலில் ஸ்கிரிப்டிலேயே இல்லை. படப்பிடிப்பு நடந்து கொண்டிருந்தபோது, ரஜினியின் மாஸ் இமேஜிற்கு ஏற்ப இடைவேளைக்கு முன் ஒரு பெரிய திருப்பம் தேவை என இயக்குநர் உணர்ந்தார். உடனடியாக ஸ்பாட்டிலேயே யோசித்து உருவாக்கப்பட்ட காட்சிதான் அது. படத்தின் மிகப்பெரிய வெற்றிக்கு அந்தக் காட்சியே அடித்தளமாக அமைந்தது.

5.'அபூர்வ சகோதரர்கள்' அப்பு கதாபாத்திரத்தின் ரகசியம்

1989-ல் வெளிவந்த 'அபூர்வ சகோதரர்கள்' படத்தில் கமல்ஹாசன் நடித்த 'அப்பு' என்ற குள்ளமான கதாபாத்திரம் அன்றைய காலத்தில் மிகப்பெரிய ஆச்சரியமாக இருந்தது. கணினி தொழில்நுட்பம் (VFX) இல்லாத காலத்தில், இதற்காகக் கமல் பயன்படுத்திய நுட்பங்கள்:

குழிக்குள் இறக்குதல் : கமலின் இயல்பான உயரத்தை விட குறைத்து காட்ட சிறு குழிகள் தோண்டி அதில் அவரை இறக்கி குள்ளமானவர் போன்று காண்பித்தனர்.

கால்களை மடித்து கட்டுதல்: முழங்கால்களை பின்புறமாகக் கட்டி வைத்து, கால்களில் பிரத்யேக ஷூக்களை மாட்டிக்கொண்டு நடித்தார்.

ஆங்கிள் ட்ரிக்ஸ் : கேமராவை குறிப்பிட்ட கோணங்களில் (Forced Perspective) வைத்து, அவரை விட உயரமான மனிதர்களுடன் ஒப்பிட்டுக் காட்டிப் படமாக்கினார்கள்.

6. 'அந்நியன்' - ‛போலீஸ் ஸ்டேஷன்' காட்சி

ஷங்கர் இயக்கத்தில் விக்ரம் நடித்த 'அந்நியன்' (2005) படத்தின் காட்சிகளில் ஒன்றில், ஒரே ஆள் மூன்று வெவ்வேறான கதாபாத்திரங்களாக (அம்பி, அந்நியன், ரெமோ) நொடிக்கு நொடி மாறும் போலீஸ் ஸ்டேஷன் காட்சி. இதை படமாக்க விக்ரம் ஒரே நாளில் நூற்றுக்கணக்கான முறை தன் உடல்மொழியையும் குரலையும் மாற்ற வேண்டி இருந்தது. எந்தவித கட் (Cut) காட்சிகளும் இன்றி, ஒரே ஷாட்டில் விக்ரமின் தத்ரூபமான நடிப்பைக் கண்டு ஷங்கர் உட்பட ஒட்டுமொத்த படக்குழுவினரும் வியந்து நின்றனர்.

7. 'தளபதி' - மழை சண்டைக்காட்சி

மணிரத்னம் இயக்கத்தில் ரஜினி - மம்முட்டி நடித்த 'தளபதி' (1991) படத்தில் ரஜினி - தினேஷ் இடையே மழையில் நனைந்த படி நடக்கும் சண்டைக் காட்சி சென்னை பின்னி மில்ஸில் படமாக்கப்பட்டது. தொடர்ந்து பெய்த செயற்கை மழையில், ரஜினிக்குக் கடும் காய்ச்சல் ஏற்பட்டது. இருப்பினும் படப்பிடிப்பு தாமதமாகக் கூடாது என்பதற்காக, காய்ச்சலையும் பொருட்படுத்தாமல் ஒரே நாளில் அந்த முழுச் சண்டைக் காட்சியையும் நடித்துக் முடித்துக் கொடுத்தார் ரஜினி.

8. 'இந்தியன்' - 'தாத்தா' கெட்டப்பிற்கு 4 மணி நேர மேக்கப்

1996-இல் வெளியான 'இந்தியன்' படத்திற்காக கமல்ஹாசனுக்கு மேக்கப் போட ஆஸ்திரேலியாவை சேர்ந்த பிரபல மேக்கப் கலைஞர்கள் வரவழைக்கப்பட்டனர். ஒவ்வொரு நாள் படப்பிடிப்பிற்கும் முன், 'இந்தியன் தாத்தா' கெட்டப் போடுவதற்கு மட்டும் குறைந்தது 4 மணி நேரம் ஆகும். படப்பிடிப்பு முடிந்த பிறகு அந்த மேக்கப்பைக் கலைக்க 2 மணி நேரம் ஆகும். இதற்காக தினமும் அதிகாலை 3 மணிக்கெல்லாம் கமல் ஷூட்டிங் ஸ்பாட்டிற்கு வந்துவிடுவார்.

பின்னாளில் கமலின் தசாவதாரம் படம் உருவானபோது அவர் நடித்த 10 வேடங்கள் ஒவ்வொன்றுக்கும் குறைந்தது 5 மணிநேரம் மேக்கப்பிற்கு மட்டும் செலவானது குறிப்பிடத்தக்கது.