தான் படித்த பள்ளிக்கு மீண்டும் சென்ற சசிகுமார்
ADDED : 7 hours ago
ஒவ்வொருவரது பள்ளி நாட்களும், கல்லூரி நாட்களும் மறக்க முடியாதவை. அதிலும் பள்ளி நாட்கள் என்ற சிறு வயதுப் பருவம் எந்த ஒரு கவலையும் இல்லாத நாட்களாக அனைவருக்குமே இருக்கும். 80களுக்கு முன்பு பள்ளிகளில் படித்தவர்களுக்கு அவர்களது நண்பர்களைத் தொடர்பில் வைத்திருந்தது குறைவாகவே இருக்கும்.
90களுக்குப் பிறகு பிறந்தவர்களுக்கு மொபைல் போன், சமூக வலைத்தளங்கள், வாட்சப் என வந்துவிட்டதால் ஒரு நண்பரைக் கூட விடாமல் இன்றும் தொடர்பில் வைத்திருக்கும் வசதி வந்துள்ளது.
பள்ளி நாட்கள், கல்லூரி நாட்கள், தங்களது வாழ்க்கையைத் திரும்பிப் பார்க்க வைக்கும் நாட்கள் என இன்றும் பலரது ரியூனியன் பற்றி பார்க்கும் போது நமக்குள்ளும் ஒரு ஆசை வரும்.
கொடைக்கானலில் உள்ள ஒரு கான்வென்ட்டில் படித்த நடிகர், இயக்குனர் சசிகுமார் அவரது பள்ளிக்கு ஒரு விசிட் அடித்துள்ளார். அந்த வீடியோ ஒன்றை அவர் பதிவிட்டுள்ளார். ஆசிரியர்கள், ஆசிரியைகள், பள்ளி ஊழியர்கள், மாணவர்கள், மாணவிகள் என அனைவருடனும் அவர் பேசியது வீடியோவில் இடம் பெற்றுள்ளது.
“மீண்டும் என் கல்விக் கூடத்திற்கு…. கனவுகள் உருவான, நட்புகள் மலர்ந்த மற்றும் நினைவுகள் என்றென்றும் பதியப்பட்ட அந்த இடத்திற்குத் திரும்பியுள்ளேன்” என இது குறித்து பதிவிட்டுள்ளார் சசிகுமார்.