பி.தாரணி, சோழவந்தான், மதுரை.

*பூஜையின் போது விளக்கேற்றுதல், சுவாமிக்கு பூ சாத்துதல் எதை முதலில் செய்ய வேண்டும்?

முதலில் விளக்கேற்றுங்கள், பிறகு பழைய பூக்களை நீக்கி விட்டு புதிய பூக்களை சாத்துங்கள்.

பி.சங்கரன், சோழிங்கநல்லுார், சென்னை.

*தொலைதுார தலங்களுக்கு சென்றால் அங்கு தரிசனத்திற்கு முன் குளிக்க வேண்டுமா?

தேவையில்லை. கை, கால்கள் கழுவி நெற்றியில் திருநீறு பூசிக் கொண்டால் போதும்.

எல்.சந்தோஷ், ஆரல்வாய்மொழி, கன்னியாகுமரி.

*'ஓம்' என்பதன் சிறப்பு என்ன?

கடவுள் முதலில் உச்சரித்த ஒலி பிரணவம் என்னும் 'ஓம்'. எல்லா கடவுளுக்கும் மூலமந்திரங்கள் 'ஓம்' என்றே தொடங்கும். பிராணயாமப் பயிற்சியின் போது இதை ஜபிக்க நோய் தீரும்.

எஸ்.கோமதிநாயகம், திருநெல்வேலி.

*ருத்திராட்சம், துளசி, ஸ்படிக மாலை அணிந்து பஸ்சில் பயணிக்கலாமா?

பயணிக்கலாம். கழிப்பறைக்குச் செல்ல நேர்ந்தால் கழற்றி பையில் வைத்துக் கொள்ளுங்கள். கை, கால்களை சுத்தம் செய்தபின் நெற்றியில் திருநீறு பூசியபின் மீண்டும் அணியுங்கள்.

கே.பாஸ்கரன், பீடம்பள்ளி, கோயம்புத்துார்.

*வீட்டின் மொட்டை மாடியில் அரசமரம் முளைத்துள்ளது. அப்புறப்படுத்தலாமா?

வீட்டில் அரசமரம் இருக்கக் கூடாது. கட்டடமும் பலவீனமாகி விடும்.

எல்.மாலா, பெங்களூரு.

*தீர்த்தங்களில் நீராடாமல் சிலர் தலையில் மட்டும் தீர்த்தம் தெளிப்பது சரிதானா?

உடம்புக்கு முடியாத சூழ்நிலையில் இப்படி செய்யலாம்.

எல்.ரகுராம், ரிஷிவந்தியம், கள்ளக்குறிச்சி.

*பெற்றோரை புறக்கணித்து விட்டு தர்மம் செய்தால் பலன் உண்டா...

பலன் கிடைக்காது. பாவச்சுமை கூடும். “பெற்றோருக்கு உடுக்க துணியில்லை, மகன் ராமேஸ்வரத்தில் வஸ்திர தானம் செய்தானாம்'' என பழமொழி உண்டே...

சி.பழனிசாமி, சிவகங்கை.

*அரசுப்பணி கிடைக்க என்ன வழிபாடு செய்யலாம்?

முதலில் அரசுப்பணி பெறுவதற்குரிய தகுதியை வளர்த்துக் கொள்ளுங்கள். அதிலுள்ள தடை விலக சங்கடஹர சதுர்த்தி விரதமிருந்து விநாயகரை வழிபடுங்கள்.

வி.கிரிஜா, கால்காஜி, டில்லி.

*திருக்கணிதம், வாக்கிய பஞ்சாங்கத்தில் திதி தொடங்கும் நேரம் மாறுபடுகிறதே...

குழப்பம் வேண்டாம். உங்கள் குடும்ப வழக்கத்தில் இருக்கும் பஞ்சாங்கத்தை பின்பற்றுங்கள்.