டவுட் தனபாலு: எம்.ஜி.ஆர்., ஜெ., காலங்களிலும் அ.தி.மு.க., தோல்வியை சந்தித்துள்ளது என்றாலும், தொடர்ந்து தோல்விகளையே சந்திக்கலையே... 'பத்து தேர்தல் தோல்வி பழனிசாமி'ன்னு உங்க முன்னாள் கூட்டாளிகளே பகடி பண்ணுவது, உங்க காதுல விழலையா என்ற, 'டவுட்'தான் வருது!



பா.ம.க., தலைவர் அன்புமணி: விக்கிரவாண்டி இடைத்தேர்தலில், அ.தி.மு.க.,வினர் 40,000 பேர் தி.மு.க.,வுக்கு ஓட்டளித்துள்ளனர். இது இடைத்தேர்தல் என்பதால், அதை அலசி ஆராயக்கூடாது. நேர்மையான முறையில் தேர்தல் நடந்திருந்தால், தி.மு.க., டிபாசிட் இழந்திருக்கும். அந்த அளவிற்கு தி.மு.க., மீது மக்கள் கோபத்தில் உள்ளனர்.

டவுட் தனபாலு: தி.மு.க., வுக்கு ஓட்டு போட்ட அ.தி.மு.க., வினரை திட்டாம, நாசுக்கா நழுவுறாரே... அடுத்து வர்ற சட்டசபை தேர்தல்ல, அவங்களுடன் கூட்டணி வைக்க வேண்டி வரலாம்கிற முன்ஜாக்கிரதையோ என்ற, 'டவுட்' தான் வருது!



முன்னாள் முதல்வர் பன்னீர்செல்வம்: ஜெ., ஆட்சி காலத்தில் முழுமையாக காவிரி நீரை பெறுவதற்கு, சட்டப்பூர்வமாக முழு உரிமையும் பெற்றிருக்கிறோம்; அதை நடைமுறைப்படுத்த வேண்டியது தமிழக அரசின் கடமை. முதல்வர் ஸ்டாலின், இண்டியா கூட்டணியில் தான் இருக்கிறார். அவர், கர்நாடகா அரசிற்கு அழுத்தம் கொடுத்து, தண்ணீர் பெற்றுத் தர வேண்டும். இல்லையேல், 'கூட்டணியை விட்டு வெளியேறுவேன்; ஆதரவை வாபஸ் பெறுவேன்' என்ற நிலைப்பாட்டை எடுத்து அறிவிக்க வேண்டும்.

டவுட் தனபாலு: என்னமோ, தி.மு.க., தயவுல மத்தியில காங்., ஆட்சி நடக்கிற மாதிரி ஆதரவை வாபஸ் வாங்குங்கன்னு துாண்டி விடுறாரோ... தப்பி தவறி கூட்டணியில் இருந்து தி.மு.க., வெளியே போனாலும், அந்த இடத்தை நிரப்ப, பழனிசாமியின் அ.தி.மு.க., தயாராக காத்துட்டு இருக்கு என்பதில், 'டவுட்'டே இல்லை!

