வாகனங்களின் எண்ணிக்கையும் அதிகரித்த வண்ணம் உள்ளது. இதனால், நகர் முழுதும் கடும் போக்குவரத்து நெரிசல் காணப்படுகிறது.

பெங்களூரில் தமிழர்கள், தெலுங்கர்கள், மலையாளிகள், மராத்தியர்கள் என பல மாநில மக்களும் வாழ்ந்து வருகின்றனர். இவர்களில் பலர், பண்டிகை தினத்தன்று தங்கள் சொந்த ஊருக்கு செல்வதை வழக்கமாக வைத்து உள்ளனர். தெலுங்கர்கள் மற்றும் கன்னடர்களின் முக்கிய பண்டிகையான யுகாதி, வரும் 30ம் தேதி ஞாயிற்று கிழமையும், முஸ்லிம்களின் பண்டிகையான ரம்ஜான் வரும் 31ம் தேதி திங்கட் கிழமையும் வருகிறது.

பயண திட்டம்

யுகாதிக்கு முந்தைய தினம் சனிக்கிழமை அரசு விடுமுறை தினம் என்பதால், மொத்தமாக மூன்று நாட்கள் விடுமுறை கிடைக்கிறது. இதனால், வெள்ளிக்கிழமை இரவே அனைவரும் தங்கள் சொந்த ஊர்களுக்கு செல்ல திட்டமிட்டு உள்ளனர்.

இதன் காரணமாக ரயில், பஸ்கள் என அனைத்திலும் டிக்கெட்டுகள் ஒரு மாதத்திற்கு முன்னரே முன்பதிவு செய்யப்பட்டு விட்டன. ஊருக்கு போக வேண்டும் என நினைப்போர் ஆம்னி பஸ்கள் மூலமே, தங்கள் ஊருக்கு செல்லும் நிலை ஏற்பட்டு உள்ளது.

இதை பயன்படுத்தி கொண்டு ஆம்னி பஸ் நிர்வாகத்தினர், டிக்கெட் கட்டணத்தை பல மடங்கு உயர்த்தி விற்பனை செய்து வருகின்றனர். இதனால், பயணியர் பலரும் அதிர்ச்சி அடைந்து உள்ளனர். அரசு உரிய நடவடிக்கை எடுக்க வேண்டும் என பலரும் கண்டனம் தெரிவித்து வருகின்றனர்.

ஆம்னி பஸ் உரிமையாளர் சங்க தலைவர் நட்ராஜ் ஷர்மா கூறியதாவது:

ஆம்னி பஸ்களின் கட்டணம் 100 சதவீதம் உயர்த்தப்படவில்லை. 50 முதல் 60 சதவீதம் உயர்த்தப்பட்டு உள்ளது. இதற்கு காரணம் மாநில அரசே. நடப்பாண்டு பட்ஜெட்டில், ஆம்னி பஸ் உரிமையாளர்கள் நலனுக்கு ஒரு ரூபாய் கூட நிதி ஒதுக்கப்படவில்லை. மகளிருக்கு வழங்கப்படும் இலவச பஸ் பயணத்தால், தனியார் பஸ் நிறுவனங்கள் நஷ்டத்தை சந்தித்து உள்ளன.

மேலும், சாலை வரி, இன்சூரன்ஸ், பஸ்களின் விலை, உதிரி பாகங்கள் என அனைத்தின் விலையும் பல மடங்கு அதிகரித்து விட்டது. எனவே, பண்டிகை காலங்களில் டிக்கெட் கட்டணத்தை உயர்த்த வேண்டிய தேவை ஏற்படுகிறது.

இவ்வாறு அவர் கூறினார்.