'நாற்பதிலும் நானே வேட்பாளர்'

முதல்வர் ஸ்டாலின் நேற்று வெளியிட்ட அறிக்கை:பிரதமர் மோடி, மாநிலம், மாநிலமாக சென்று திட்டங்களை துவக்கி வருகிறார். அவரது பதற்றமானது, அவர்கள் முகத்தில் இருக்கும் பயத்தை காட்டுகிறது. மீண்டும் மோடி என்று அவரது ஆதரவாளர்கள் எவ்வளவு கூச்சல் இட்டாலும், வேண்டாம் மோடி என்பதே, இந்தியா முழுதும் ஒலிக்கிறது.தமிழகத்தில், இண்டியா கூட்டணியில் தொகுதி பங்கீட்டை வெற்றிகரமாக முடித்துள்ளோம்.
நாங்கள் கொடுத்தோம்; அவர்கள் பெற்றார்கள் என்றில்லாமல், அனைவரும் அமர்ந்து பேசி, தொகுதிகளை பகிர்ந்து கொண்டோம் என்பதே உண்மை. எண்ணிக்கை முக்கியமல்ல; எண்ணம் தான் முக்கியம் என்பதை கூட்டணி கட்சி தலைவர்கள் உணர்ந்திருந்தனர். இந்த ஒற்றுமை உணர்வு, 40 தொகுதிகளிலும் வெற்றியை பெற்றுத் தரும். தேர்தலுக்கு தேர்தல் கூட்டணி மாறும் என்பதை மாற்றி, இலக்கு ஒன்றாக இருந்தால், கூட்டணியும் மாறாது என்பதை நிரூபித்து வருகிறாம்.
இதையே இண்டியா கூட்டணியின் துவக்கக்கூட்டத்திலும் நான் வலியுறுத்தினேன். அதுதான் இன்று மாபெரும் கூட்டணியாக மலர்ந்துள்ளது. புதுச்சேரி உட்பட, 40 தொகுதிகளிலும் வெற்றிக்கு தி.மு.க.,வினர் பாடுபட வேண்டும்; 40 தொகுதிகளிலும், வேட்பாளர் ஸ்டாலின் என்பதை மனதில் வைத்து, அனைவரும் பணியாற்ற வேண்டும்.இவ்வாறு அவர் கூறியுள்ளார்.

ஏற்கனவே முடிச்சிட்டோம்!

வேட்பாளர்கள் நேர்காணலுக்கு முன், லோக்சபா தொகுதிகளில் உள்ளபேரூராட்சி, நகர, ஒன்றிய, மாவட்ட நிர்வாகிகள், உள்ளாட்சி பிரதிநிதிகள்,எம்.எல். ஏ.,க்களை அழைத்து, அவர்களிடம் தேர்தல் கள ஆய்வு நடத்தினோம்.
அக்கூட்டத்திற்கு, சிட்டிங் எம்.பி.,க்களை மட்டும் அழைக்கவில்லை. இந்த ஆய்வுக் கூட்டம் எட்டு நாட்கள் நடந்தது. அதில் 2,000 பேர் பங்கேற்றனர். அப்போது, எந்தெந்த தொகுதிகளில் தி.மு.க., கூட்டணிக்கு வாய்ப்பு என்பதை, முழு அறிக்கையாக தயாரித்து, முதல்வரிடம் வழங்கி விட்டோம். எனவே, நேர்காணலில் போட்டியிட விருப்பம் தெரிவித்தவர்களிடம் முக்கிய கேள்விகளை மட்டும் கேட்டோம்.
மற்ற நிர்வாகிகளை அழைக்கவில்லை என்பதால், அதிக நேரமும் எடுக்கவில்லை. கூட்டணி கட்சிகளுக்கு எந்தெந்த தொகுதிகள் ஒதுக்கப்படும் என்பதை நாங்கள் கணித்து வைத்திருந்தால், அந்தந்த தொகுதிகளின்நிர்வாகிகளிடம், சில கேள்விகளை மட்டும் கேட்டு அனுப்பி விட்டோம்.

- ஆர்.எஸ்.பாரதி, தி.மு.க., அமைப்புச் செயலர்.