இந்தியா வந்துள்ள ஆஸ்திரேலிய அணி, மூன்று போட்டிகள் கொண்ட ஒருநாள் தொடரில் பங்கேற்றது. முதலிரண்டு போட்டிகளின் முடிவில் தொடர் 1-1 என சமநிலையில் இருந்தது. டில்லியில் 3வது போட்டி நடந்தது.

'டாஸ்' வென்று முதலில் 'பேட்' செய்த ஆஸ்திரேலிய அணிக்கு பெத் மூனே (138) சதம் விளாசினார். ஜார்ஜியா (81), எலிஸ் பெர்ரி (68) அரைசதம் கடந்தனர். கேப்டன் அலிசா ஹீலி (30), ஆஷ்லி கார்ட்னர் (39) ஓரளவு கைகொடுத்தனர். ஆஸ்திரேலிய அணி 47.5 ஓவரில் 412 ரன்னுக்கு 'ஆல்-அவுட்' ஆனது. இந்தியா சார்பில் அருந்ததி ரெட்டி 3, ரேணுகா சிங், தீப்தி சர்மா தலா 2 விக்கெட் சாய்த்தனர்.

மந்தனா அபாரம்: கடின இலக்கை விரட்டிய இந்திய அணிக்கு பிரதிகா ரவால் (10), ஹர்லீன் தியோல் (11) ஏமாற்றினர். பின் இணைந்த ஸ்மிருதி மந்தனா, கேப்டன் ஹர்மன்பிரீத் கவுர் ஜோடி நம்பிக்கை தந்தது. ஆஷ்லி கார்ட்னர் வீசிய 12வது ஓவரில் ஒரு சிக்சர், ஒரு பவுண்டரி விளாசிய மந்தனா, அலானா கிங் பந்தை சிக்சருக்கு அனுப்பி, 50 பந்தில் சதத்தை எட்டினார். கிரேஸ் ஹாரிஸ் பந்தை பவுண்டரிக்கு அனுப்பிய ஹர்மன்பிரீத் கவுர், 32 பந்தில் அரைசதத்தை பதிவு செய்தார். மூன்றாவது விக்கெட்டுக்கு 121 ரன் சேர்த்த போது ஹர்மன்பிரீத் (52) அவுட்டானார். மந்தனா 125 ரன்னில் (5 சிக்சர், 17 பவுண்டரி) ஆட்டமிழந்தார்.

ரிச்சா கோஷ் (6), ராதா யாதவ் (18), அருந்ததி ரெட்டி (10) நிலைக்கவில்லை. தீப்தி சர்மா (72), ஸ்னே ராணா (35) ஓரளவு கைகொடுத்தனர். ரேணுகா சிங் (2) ஏமாற்றினார். இந்திய அணி 47 ஓவரில் 369 ரன்னுக்கு 'ஆல்-அவுட்டாகி' 43 ரன் வித்தியாசத்தில் தோல்வியடைந்தது. ஆஸ்திரேலிய அணி 2-1 என தொடரை கைப்பற்றி கோப்பை வென்றது.

இது அதிகம்

பெண்கள் ஒருநாள் போட்டி அரங்கில் ஆஸ்திரேலிய அணி, தனது அதிகபட்ச ஸ்கோரை (412) சமன் செய்தது. ஏற்கனவே டென்மார்க் அணிக்கு (1997, இடம்: மும்பை) எதிராக 412/3 ரன் எடுத்திருந்தது.

இரண்டாவது இடம்

ஒருநாள் போட்டியில் அதிக சதம் விளாசிய வீராங்கனைகள் வரிசையில் இந்தியாவின் ஸ்மிருதி மந்தனா, 2வது இடத்தை நியூசிலாந்தின் சுசி பேட்ஸ் உடன் பகிர்ந்து கொண்டார். இருவரும் தலா 13 சதம் அடித்தனர். முதலிடத்தில் ஆஸ்திரேலியாவின் மேக் லானிங் (15 சதம்) உள்ளார்.

அதிவேக சதம்

ஒருநாள் போட்டி அரங்கில் அதிவேக சதம் விளாசிய வீராங்கனைகள் பட்டியலில் இந்தியாவின் ஸ்மிருதி மந்தனா (50 பந்து) 2வது இடம் பிடித்தார். முதலிடத்தில் ஆஸ்திரேலியாவின் மேக் லானிங் (45 பந்து, எதிர்: நியூசி., 2012) உள்ளார்.

* அதிவேக சதம் விளாசிய இந்தியர் (வீரர்/வீராங்கனை) வரிசையில் மந்தனா முதலிடம் பிடித்தார். இதற்கு முன் கோலி (52 பந்து, எதிர்: ஆஸி., 2013) முதலிடத்தில் இருந்தார்.

'பிங்க்' ஜெர்சி

மார்பக புற்றுநோய் விழிப்புணர்வை ஏற்படுத்த, நேற்று இந்திய வீராங்கனைகள் 'பிங்க்' நிற ஜெர்சி அணிந்து விளையாடினர்.

300 ரன்

இத்தொடரில் அதிக ரன் குவித்த வீராங்கனைகள் வரிசையில் இந்தியாவின் ஸ்மிருதி மந்தனா முதலிடம் பிடித்தார். மூன்று போட்டியில், 2 சதம், ஒரு அரைசதம் உட்பட 300 ரன் (சராசரி 100.00, 'ஸ்டிரைக் ரேட்' 138.24) குவித்தார்.