இளம்புலி விளையாட்டு கழகத்தின் சார்பில், மாநில அளவிலான வாலிபால் போட்டி நாமக்கல் மாவட்டம், துாசூரில் நடந்தது.

இதில், சென்னை உட்பட பல்வேறு மாவட்டங்களில் இருந்து, எட்டு அணிகள் பங்கேற்றன. போட்டிகள் 'லீக்' மற்றும் 'நாக் - அவுட்' முறையில் நடந்தன.

'லீக்' போட்டியில், சென்னை ஜேப்பியார் பல்கலை, 25 - 10, 25 - 13 என்ற கணக்கில், கேரளாவின் செயின்ட் சேவியர் அணியையும், மற்றொரு போட்டியில், 25 - 15, 25 - 14, 25 - 23 என்ற கணக்கில், சேலம் செயின்ட் மேரிஸ் அணியையும் தோற்கடித்தது.

அரையிறுதியிலும் சிறப்பாக விளையாடிய ஜேப்பியார் அணி, 12 - 25, 25 - 14, 25 - 23 என்ற கணக்கில், சேலம் பாரதியார் கல்லுாரியை வீழ்த்தியது.

இறுதிப் போட்டியில், ஜேப்பியார் மற்றும் மதுரை அமெரிக்கன் கல்லுாரி அணிகள் மோதின. இதில், 18 - 25, 25 - 13, 25 - 21 என்ற கணக்கில், ஜேப்பியார் பல்கலை வெற்றி பெற்று முதலிடத்தை பிடித்து அசத்தியது.

சென்னை பனிமலர், சேலம் பாரதியார் அணிகள் முறையே மூன்று மற்றும் நான்காம் இடங்களைக் கைப்பற்றின.