ராமர் பிறந்த புண்ணிய பூமியான அயோத்தியில், ராமர் பிராண பிரதிஷ்டை நேற்று கோலாகலமாக கொண்டாடப்பட்டது. நாடு முழுவதும் மக்கள் உற்சாகத்துடன் கொண்டாடினர். கோவை ராம்நகரிலுள்ள கோதண்டராமஸ்வாமி தேவஸ்தானத்தில், மிகப்பெரும் வைபவமாக கும்பாபிேஷக விழா கொண்டாடப்பட்டது.

அதன்படி, நேற்று காலை 6:00 மணிக்கு பூபாள ராகத்தில் மங்களவாத்தியத்துடன் நிகழ்ச்சிகள் துவங்கின. காலை, 7:00 மணிக்கு திருப்பள்ளி எழுச்சி, திருப்பாவை சேவாகாலம் கோஷ்டி சார்பில் நடத்தப்பட்டது.

காலை 8:00 மணிக்கு விஷ்ணு சகஸ்ரநாம பாராயணமும், காலை, 9:00 மணிக்கு ராம்நகர் பஜனை கோஷ்டியினரின் ராமநாமசங்கீர்த்தனமும் நடந்தன.

காலை, 10:00 மணிக்கு நாமபஜன் மண்டலியினரின் ராமநாம சங்கீர்த்தனம், காலை, 12:00 மணிக்கு ராமர் கோவில் வளாகத்திலுள்ள அபிநவவித்யா தீர்த்த மண்டபத்தில் சீதாராமர் திருக்கல்யாண மஹோற்சவம் நடந்தது. திரளான பக்தர்கள் திருக்கல்யாண மஹோற்சவத்தை கண்டனர்.

மதியம், 1:00 மணிக்கு பிரசாத வினியோகம் நடந்தது. மாலை 4:00 மணிக்கு ஸ்ரீ கார்த்தி ஞானேஸ்வர் குழுவினரின் நாமசங்கீர்த்தனமும், 5:00 மணிக்கு வேதபண்டிதர்களின் வேதகோஷ முழக்கமும் நடந்தது.

மாலை 6:00 மணிக்கு கோவில் மகாமண்டபத்தில், தர்மதீபம் ஏற்றி வைக்கப்பட்டது. 2,008 விளக்குகளை, கோவில் சுற்றுப்பிரகாரத்தில் பக்தர்கள் ஏற்றினர்.

மாலை 6:20 மணிக்கு சிறப்பு அலங்காரத்தில் எழுந்தருளிய சீதா, லட்சுமண சமேத கோதண்டராமர் உற்சவராக திருவீதி உலா வந்து, பக்தர்களுக்கு காட்சியளித்தார்.

ராமர் கோவில் வீதி, சென்குப்தா, ராஜாஜி, சத்தியமூர்த்தி வீதி வழியாக திருவீதி உலா மீண்டும் ராமர் கோவிலை அடைந்தது. மாலை 6:30 மணிக்கு ராமர் சரித்திர நாட்டிய நாடகம், பவித்ரா சீனிவாசன் மற்றும் லாவண்யா சங்கர் குழுவினரால் அரங்கேற்றப்பட்டது.

கோதண்டராமர் தேவஸ்தான அறங்காவலர் குழு தலைவர் நாகசுப்ரமணியன், செயலாளர் விஸ்வநாதன் உள்ளிட்ட பலர் நிகழ்ச்சியில் பங்கேற்றனர்.