தென் மாவட்டங்களில் இருந்து வரும் அரசு விரைவு பேருந்துகள், கிளாம்பாக்கம் புறநகர் பேருந்து நிலையம் வரை மட்டுமே இயக்கப்படுகின்றன.

விழுப்புரம், கும்பகோணம் உள்ளிட்ட பிற மாவட்டங்களில் இருந்து வரும் கோட்ட பேருந்துகள், கோயம்பேடு பேருந்து நிலையத்திற்கு நேற்று இயக்கப்பட்டன.

ஒரே நேரத்தில் பேருந்துகள் மற்றும் சொந்த வாகனங்களில் பயணியர் வந்ததால், முக்கிய சாலைகளில் நெரிசல் ஏற்பட்டது.

குறிப்பாக, ஆம்னி பேருந்துகள் கிளாம்பாக்கம் நிலையத்திற்குள் செல்லாமல், ஜி.எஸ்.டி., சாலையிலேயே பயணியரை இறக்கிவிட்டு, கோயம்பேடு வரை இயக்கப்பட்டதால், பல இடங்களில் வாகன நெரிசல் ஏற்பட்டது.

பெருங்களத்துார், தாம்பரம், கோயம்பேடு - பூந்தமல்லி நெடுஞ்சாலை உட்பட பல முக்கிய சாலைகளில் நெரிசல் ஏற்பட்டு, வாகன ஓட்டிகள் திணறினர்.

வெளியூர்களில் இருந்து வந்து கிளாம்பாக்கம் - தாம்பரம் தடத்தில் பல்வேறு இடங்களில் இறங்கியோர், போதிய பேருந்து கிடைக்காமல் சிரமப்பட்டனர்.

வெளியூர்களில் இருந்து வந்த பெரும்பாலானோர், நெரிசலில் சிக்காமல் இருக்க, புறநகர் ரயில் நிலைய பகுதிகளில் இறங்கி, அங்கிருந்து ரயில்கள் வாயிலாக தங்கள் இடங்களுக்கு சென்றனர்.

குறிப்பாக, கிளாம்பாக்கம் பேருந்து நிலையத்திற்கு அருகில் உள்ள பொத்தேரி, மறைமலை நகர், கூடுவாஞ்சேரி, பெருங்களத்துார் உள்ளிட்ட புறநகர் ரயில் நிலையங்களில் கூட்டம் அலைமோதியது. அவர்கள் புறநகர் ரயில் வாயிலாக, சென்னை நகருக்குள் பல்வேறு இடங்களுக்கு சென்றடைந்தனர்.

அம்பத்துார், ஆவடி உள்ளிட்ட பகுதிகளுக்கு செல்ல வேண்டிய பயணியர், கிளாம்பாக்கம் நிலையம் சென்று, அங்கிருந்து மாநகர பேருந்துகள் வாயிலாக சென்றனர்.

கிளாம்பாக்கத்திற்குள், சொற்ப பயணியருடனே அரசு விரைவு போக்குவரத்துக் கழக பேருந்துகள் வந்தன.

அங்கு, உணவகம் மற்றும் கடைகள் மூடப்பட்டிருந்ததால் பயணியர் அவதிப்பட்டனர்.

இது குறித்து நெல்லையைச் சேர்ந்த பயணி ஒருவர் கூறியதாவது:

திருநெல்வேலியில் இருந்து கிளம்பிய அரசு விரைவு பேருந்தில் அனைத்து இருக்கைகளிலும் பயணியர் இருந்தனர்.

செங்கல்பட்டு, சிங்கப்பெருமாள் கோவில், மறைமலை நகர், பொத்தேரி, கூடுவாஞ்சேரி என, அடுத்தடுத்த ரயில் நிலைய பகுதிகளில் பயணியர் இறங்கினர்.

ஐந்து பயணியர் மட்டுமே கிளாம்பாக்கம் பேருந்து நிலையத்தில் வந்து இறங்கினோம். இங்கு, அனைத்து கடைகளும் அடைக்கப்பட்டு இருந்தன.

ஆவின் பாலகம் மற்றும் ஒரு ஹோட்டல் மட்டுமே திறந்திருந்தன. வளாகத்திற்குள் ஏ.டி.எம்., மையம் இல்லை. இதனால் மிகுந்த அலைச்சல் ஏற்பட்டது.

இவ்வாறு அவர் கூறினார்.

கிளாம்பாக்கம் மற்றும் கோயம்பேடு பேருந்து நிலையங்களில், பயணியர் வசதிக்காக வழக்கத்தைவிட கூடுதலாக 250 பேருந்துகள் 400 நடைகளாக இயக்கப்பட்டன.

கிளாம்பாக்கத்தில் இறங்கி, அங்கிருந்த சென்னைக்கு செல்ல நேரம் விரயமாகும்.

ஆம்னி பேருந்தில் வந்ததால், கோயம்பேடுக்கு அதிகாலை வந்துவிட்டோம். இதனால், என் கணவர், அலுவலகத்திற்கு குறித்த நேரத்தில் செல்ல முடியும். கிளாம்பாக்கம் சென்று, அங்கிருந்து வேறு பேருந்து பிடித்து வந்திருந்தால், கணவர் வேலைக்கு செல்ல தாமதமாயிருக்கும்.

எம்.அர்ஷினி, 32, -

நெல்லை

போக்குவரத்து நெரிசலுக்கு தீர்வாக, புதிய பேருந்து நிலையம் உருவாக்கியது நல்லது. அதேநேரம், பயணியர் சிரமத்தை குறைக்கும் வகையில், அரசு யோசித்திருக்க வேண்டும். விரைவு பேருந்துகளில் முன்பதிவு செய்யும்போதே, கிளாம்பாக்கத்தில் இருந்து கோயம்பேடு செல்லும் வகையில் இணைப்பு பேருந்துக்கான முன்பதிவு வசதியையும் ஏற்படுத்தி, அதற்கென தனி பேருந்து இயக்கியிருந்தால், மக்களுக்கு சிரமம் ஏற்பட்டிருக்காது.

ஜெ.தினேஷ், 42,

வடபழநி.

- நமது நிருபர் -