இருப்பினும், மாநகராட்சி 22வது வார்டுக்கு உட்பட்ட திருக்காலிமேடு, பாலாஜி நகரில், ஒரு வாரம், 10- - 15 நாட்களுக்கு ஒரு முறை மட்டுமே துாய்மை பணியாளர்கள் குப்பை சேகரித்து வந்தனர்.

இந்நிலையில், ஒரு மாதத்திற்கு மேலாக பாலாஜி நகருக்கு குப்பை சேகரிக்க துாய்மை பணியாளர்கள் வருவதில்லை என, புகார் எழுந்துள்ளது.

இதனால், அப்பகுதியினர் சிந்தாமணி விநாயகர் கோவில் மற்றும் மின்மாற்றி அருகில் குப்பையை கொட்டுகின்றனர். நாள் கணக்கில் அகற்றப்படாத குப்பையால் அப்பகுதியில் துர்நாற்றம் வீசுகிறது.

இப்பகுதிக்கு என நியமிக்கப்பட்டுள்ள துாய்மை பணியாளர்கள், பாலாஜி நகர் நுழைவு பகுதியான, சவுராஷ்டிரா தெருவில் வசிப்போரிடம் குப்பை சேகரித்ததாக, கையெழுத்து வாங்கிவிட்டு திரும்பி விடுகின்றனர்.

தீபாவளி பண்டிகைக்குபின், ஒரே ஒரு முறை மட்டுமே குப்பை சேகரிக்க வந்தனர். இதனால், இத்தெருக்களில் குப்பை குவியலாக உள்ளதால், சுகாதார சீர்கேடு ஏற்படும் சூழல் உள்ளது.

எனவே, துாய்மை பணியாளர் தினமும் குப்பை சேகரிக்க வர வேண்டும் என, திருக்காலிமேடு பாலாஜி நகர் பகுதிவாசிகள் வலியுறுத்தி உள்ளனர்.

இதுகுறித்து காஞ்சிபுரம்மாநகராட்சி சுகாதார அலுவலர் அருள்மொழி கூறியதாவது:

திருக்காலிமேடு பாலாஜி நகர் பகுதியில், குப்பையை சேகரிக்க துாய்மை பணியாளர்கள் நீண்ட நாட்களாக வராமல் இருக்க வாய்ப்பு இல்லை.

இருப்பினும் இதுகுறித்து ஆய்வு செய்து, அப்பகுதியில் துாய்மை பணியாளர்கள் முறையாக குப்பை சேகரிக்க நடவடிக்கை எடுக்கப்படும்.

இவ்வாறு அவர் கூறினார்.