கிருஷ்ணகிரி மாவட்டத்தில் அரசு நிகழ்ச்சிகளில் பங்கேற்க, தமிழக முதல்வர் ஸ்டாலின் நாளை (செப்.11) ஓசூர் வருகிறார். பேலகொண்டப்பள்ளியிலுள்ள, 'தனுஜா ஏரோஸ்பேஸ் அண்ட் ஏவியேசன்' (தால்) நிறுவனத்திற்கு காலை, 11:00 மணிக்கு தனி விமானத்தில் வருகிறார்.

11:35 முதல், 12:50 மணி வரை, ஓசூர் - தளி சாலையில் உள்ள ஆனந்த் கிரான்ட் பேலஸ் திருமண மண்டபத்தில் நடக்கும் தொழில் முதலீட்டாளர்கள் மாநாட்டில் பங்கேற்கிறார். மதியம், 1:20 மணிக்கு, பாகலுார் சாலையில் எல்காட் தொழில்நுட்ப பூங்காவில் அமைய உள்ள அசன்ட் சர்க்யூட் நிறுவனத்திற்கு முதல்வர் அடிக்கல் நாட்டுகிறார்.

மதியம், 2:00 முதல், மாலை, 4:00 மணி வரை, ஓசூர், தி.மு.க., - எம்.எல்.ஏ., பிரகாஷ் வீட்டில் மதிய உணவு சாப்பிட்டு விட்டு ஓய்வெடுக்கிறார். மாலை, 4:30 மணிக்கு சூளகிரி பஸ் ஸ்டாண்டிற்கு செல்லும் முதல்வர் ஸ்டாலின், அங்கிருந்து தேசிய நெடுஞ்சாலை வரை 'ரோட்ஷோ' செல்கிறார். மாலை, 5:00 மணிக்கு, குருபரப்பள்ளி டெல்டா நிறுவனத்தின் புதிய தொழிற்சாலை பணியை துவக்கி வைக்கிறார். 6:00 மணிக்கு கிருஷ்ணகிரி டோல்கேட்டிலிருந்து 'ரோட்ஷோ' நடக்கிறது. இதற்கான முன்னேற்பாடு பணிகளை, அமைச்சர் சக்கரபாணி தலைமையில், தி.மு.க., - எம்.எல்.ஏ.,க்கள் பிரகாஷ், மதியழகன் மற்றும் நிர்வாகிகள் செய்து வருகின்றனர். முதல்வர் வருகை நிகழ்ச்சி நிரல் கடைசி நேரத்தில் மாறுதலுக்கு வாய்ப்புள்ளதாக, அரசு அலுவலர்கள் தெரிவித்தனர்.