முன்னதாக நாளை ராமேஸ்வரம் கோயிலில் பூஜை செய்து தீர்த்தங்களை சேகரிக்கிறார்.

நாளை(ஜன.,20) மதியம் 2:00 மணிக்கு பிரதமர் மோடி ராமேஸ்வரத்திற்கு ஹெலிகாப்டரில் வந்திறங்கி காரில் ராமநாதசுவாமி கோயிலுக்கு செல்கிறார். மதியம் 2:10 முதல் 2:45 வரை நடக்கும் ராமரின் கீர்த்தனை நிகழ்ச்சியில் பங்கேற்கிறார்.

மதியம் 2:45 முதல் 3:30 மணி வரை கோயில் வளாகத்தில் உள்ள 22 தீர்த்தங்களில் பிரதமர் மோடி புனித நீராடி சுவாமி தரிசனம் செய்கிறார். மதியம் 3:35 முதல் இரவு 7:15 மணி வரை நடக்கும் ராமாயண சொற்பொழிவு நிகழ்ச்சியில் பங்கேற்கிறார்.

இரவு 7:25 மணிக்கு ராமகிருஷ்ண மடத்திற்கு சென்று ஓய்வெடுக்கிறார்.

உபவாசம்

அயோத்தி ராமர் கோயில் கும்பாபிஷேகத்தையொட்டி 11 நாட்கள் உபவாசம் (விரதம் ) இருக்கும் பிரதமர் மோடி தினமும் ஒரு வேளை மட்டும் சாப்பிடுகிறார். அதனால் ராமேஸ்வரம் ராமகிருஷ்ண மடத்தில் சிறப்பு பூஜை செய்து கட்டில் மெத்தை இன்றி தரையில் எளிமையான படுக்கை விரித்து ஓய்வெடுக்க உள்ளார்.

தனுஷ்கோடியில் பூஜை

ஜன.,21 காலை 9:00 மணிக்கு மடத்தில் இருந்து காரில் புறப்பட்டு ஸ்ரீ ராமர் இலங்கைக்கு பாலம் அமைத்த தனுஷ்கோடி அரிச்சல்முனை கடற்கரைக்கு செல்கிறார். அங்கு காலை 9:30 முதல் 10:00 மணி வரை ஸ்ரீ ராமரை வேண்டி யாகம் வளர்த்து பூஜை செய்து சுவாமி தரிசனம் செய்கிறார்.

பின் தனுஷ்கோடி அருகே உள்ள விபீஷணருக்கு பட்டாபிஷேகம் சூட்டிய இடத்தில் அமைந்துள்ள கோதண்டராமர் கோயிலில் காலை 10:30 முதல் 11:00 மணி வரை சுவாமி தரிசனம் செய்கிறார். ராமேஸ்வரத்தில் இருந்து காலை 11:30 மணிக்கு ஹெலிகாப்டரில் மதுரை புறப்படுகிறார். அங்கிருந்து விமானத்தில் டில்லி செல்கிறார்.