இதற்கிடையில், மத்திய அரசும், ராணுவ வீரர்கள், துணை ராணுவ படையினருக்கான உணவு பட்டியலில், சிறு தானிய வகைகளையும் சேர்த்துள்ளது. எனவே, தமிழக விவசாயிகளிடம் இருந்து நடப்பு சீசனில், 17,000 டன் கேழ்வரகு கொள்முதல் செய்து தருவதற்கு நுகர்பொருள் வாணிபக் கழகத்திற்கு, இந்திய உணவு கழகம் அனுமதி அளித்துள்ளது. இதற்காக, 100 கிலோ எடை உடைய குவிண்டால் கேழ்வரகுக்கு, 3,846 ரூபாய் வழங்கப்படுகிறது.

டிசம்பரில் துவங்கி அடுத்த மாதத்திற்குள் கேழ்வரகு கொள்முதலை முடிக்க வேண்டும். எனவே, நுகர்பொருள் வாணிபக் கழகம், தர்மபுரி, கிருஷ்ணகிரி, ஈரோடு, சேலம் மாவட்டங்களில் உள்ள விவசாயிகளிடம் இருந்து, தற்போது கேழ்வரகு கொள்முதல் செய்யும் பணியை துவக்கியுள்ளது.

நேற்று முன்தினம் வரை, 24 டன் கேழ்வரகு கொள்முதல் செய்யப்பட்டுள்ளது. ஆண்டு முழுதும் கேழ்வரகு கொள்முதலுக்கு தமிழகம் அனுமதி கோரியிருந்தது. இதுவரை, அதற்கு ஒப்புதல் கிடைக்கவில்லை.