வழக்கறிஞரான இவர், கிட்டத்தட்ட ஆறு ஆண்டுகளாக, சிட்ஜூ, ரெட்ரீவர், சவ்-சவ் உள்ளிட்ட பல்வேறு இன பப்பிகளை இனப்பெருக்கம் செய்து விற்பனை செய்கிறார். பார்ப்பதற்கு சிங்கக்குட்டி போல காட்சியளிக்கும் சவ்-சவ் பப்பியின் தனித்துவம் குறித்து இவர் நம்மிடம் பகிர்ந்தவை:

 இதன் பூர்வீகம், சீனா. இதன் முகத்தில், மூக்கு, வாயை சுற்றிலும் முடி இருப்பதால், சிங்கத்தின் முகத்தை போன்ற தோற்றத்தை ஏற்படுத்தும். இதன் ராஜகம்பீர நடை, சிங்கத்தை ஒத்ததாக இருப்பதால், பலரும் விரும்பி வாங்குகின்றனர்.

 இதன் நாக்கு, அடர்நீலம், கருப்பு நிறத்தில் இருக்கும். கிட்டத்தட்ட இரண்டரை அடி உயரமும், 35 கிலோ வரை எடையுடன், உடல் முழுக்க முடி இருப்பதால், பராமரிப்பில் அதிக முக்கியத்துவம் கொடுக்க வேண்டும்.

 இது, அதிகம் குரைக்காது; ஆனால், வீட்டை எப்போதும் நோட்டமிட்டு கொண்டேஇருக்கும். சில நேரங்களில், புதிய ஆட்கள் வீட்டிற்குள் வந்தால், எளிதில் அனுமதிக்காது. புதிய ஆட்களிடம் எளிதில் நெருங்காது. பாதுகாவலுக்கு ஏற்றது.

 உரிமையாளர் என்ன சொன்னாலும் கேட்கும். இதன் உருவம் தான் சற்று பயமுறுத்துமே தவிர, பப்பியாக இருக்கும் போதே பழகினால், உங்களையே சுற்றி சுற்றி வரும்.

 அதிக வெப்பம் கொண்ட இடங்களில் இதை வளர்க்க கூடாது. இதன் உடல் முழுக்க நெருக்கமான முடிகள் இருப்பதால், வீட்டிற்குள்ளே வைத்து வளர்ப்பதே நல்லது. வெயில் நேரத்தில், ஏசி., மின்விசிறி வைக்க வேண்டும்.

 அதிகபட்சம் 12 ஆண்டுகள் வரை உயிர்வாழும் இந்த சவ்-சவ் பப்பிக்கு அதிக பயிற்சி அளிக்க வேண்டியதில்லை. எதையும் எளிதில் புரிந்து கொள்ளும் திறன் கொண்டது.

 கும்பகர்ணனுக்கே சவால் விடும் அளவுக்கு துாங்கும். ஆனால் விளையாட ஆரம்பித்தால் 'அணில்' போன்று சுறுசுறுப்பாகிவிடும். குழந்தைகள் இருக்கும் வீட்டில் இதை வளர்த்தால், எப்போதும் பிசியாக விளையாடி கொண்டே இருக்கும், என்றார்.