அமெரிக்காவில், உலகின் முன்னணி கிளப் அணிகள் பங்கேற்கும் 'பிபா' உலக கோப்பை 21வது சீசன் நடக்கிறது. சியாட்டிலில் நடந்த 'இ' பிரிவு லீக் போட்டியில் இன்டர் மிலன் (இத்தாலி), ரிவர் பிளேட் (அர்ஜென்டினா) அணிகள் மோதின. இதில் இன்டர் மிலன் அணி 2-0 என்ற கணக்கில் வெற்றி பெற்றது.

மற்றொரு 'இ' பிரிவு லீக் போட்டியில் மான்டேரி அணி (மெக்சிகோ) 4-0 என உராவா ரெட் டயமண்ட்ஸ் அணியை (ஜப்பான்) வீழ்த்தியது. முடிவில் 'இ' பிரிவில் முதலிரண்டு இடம் பிடித்த இன்டர் மிலன் (7 புள்ளி), மான்டேரி (5) அணிகள் 'நாக்-அவுட்' சுற்றுக்குள் நுழைந்தன.

டார்ட்மண்ட் வெற்றி: 'எப்' பிரிவு லீக் போட்டியில் போருசியா டார்ட்மண்ட் (ஜெர்மனி), உல்சன் (தென் கொரியா) அணிகள் மோதின. இதில் டார்ட்மண்ட் அணி 1-0 என வெற்றி பெற்றது.மமெலோடி சன்டவுன்ஸ் (தென் ஆப்ரிக்கா), புளுமினென்ஸ் (பிரேசில்) அணிகள் மோதிய

மற்றொரு 'எப்' பிரிவு போட்டி கோல் எதுவுமின்றி 'டிரா' ஆனது. முடிவில் 'எப்' பிரிவில் முதலிரண்டு இடம் பிடித்த டார்ட்மண்ட் (7 புள்ளி), புளுமினென்ஸ் (5) அணிகள் 'ரவுண்டு-16' போட்டிக்கு தகுதி பெற்றன.

பிரேசில் ஆதிக்கம்

இத்தொடரில் பங்கேற்கும் பிரேசிலை சேர்ந்த பிளாமெங்கோ, பால்மீராஸ், போடா போகோ, புளுமினென்ஸ் என 4 கிளப் அணிகளும் 'நாக்-அவுட்' சுற்றுக்கு முன்னேறின. 'ரவுண்டு-16' போட்டியில் பால்மீராஸ், போடா போகோ அணிகள் மோதுவதால், ஒரு பிரேசில் கிளப் அணி காலிறுதிக்கு செல்வது உறுதியானது.